మానుకోట లో కార్డెన్ తనిఖీ.. రూ.7 లక్షల అక్రమ సామాగ్రి స్వాధీనం

బోడ కిషన్, మానుకోట రిపోర్టర్, ఖమ్మం టీవీ.
..............................................................
మహబూబాబాద్ పట్టణంలో పోలీస్ లు కార్డెన్ తనిఖీలు నిర్వహించారు. రూ.7 లక్షల విలువైన అక్రమ మద్యం, ఇతర సామాగ్రి ని స్వాధీనం చేసుకున్నట్లు జిల్లా పోలీస్ పర్యవేక్షణాధికారి (SP) నంద్యాల కోటిరెడ్డి ప్రకటించారు. అనుమానితులుగా ఉన్న పలువురిని విచారిస్తున్నట్లు ఆయన వివరించారు. తనిఖీల అనంతరం ఏర్పాటు చేసిన మీడియా సమావేశంలో SP కోటిరెడ్డి మాట్లాడారు. తనిఖీలకు సంబందించిన వివరాలను వెల్లడించారు......
పోలీస్ తనిఖీల్లో భాగంగా మానుకోట పట్టణంలోని బెస్త బజార్, హనుమంతుని గడ్డా, మందుల బజార్, వివేకానంద కూడలీ, గోగుల మల్లయ్య బజార్, గణేష్ నగర్, రామచంద్రాపురం కాలనీ, శివాజీ నగర్, గుమ్ముడూరు తదితర ప్రాంతాల్లో తెల్లవారు జామునుంచే 100 మంది పోలీసులు విస్తృతంగా తనిఖీలు చేపట్టారు. గడప గడపకు తిరుగుతూ అనుమానితులను ప్రశ్నించారు. తనిఖీల్లో అక్రమంగా నిల్వ చేసిన, అనుమతి పత్రాలు లేని సామాగ్రిని స్వాధీనం చేసుకున్నారు. రూ.50 వేల విలువ గల మద్యం, రూ.10 వేల విలువగల నిషేదిత గుట్కా, రూ.2 వేల విలువ గల క్వింటా రేషన్ బియ్యం, రూ.2 వేల విలువ గల 20 లీటర్ల గుడుంబా, రూ.4 లక్షల విలువ గల 20 ద్విచక్ర వాహానాలూ, రూ.2 లక్షల విలువ గల 4 త్రి చక్ర వాహానాలూ, రూ.30 వేల విలువ గల టపాసులను స్వాధీనం చేసుకున్నారు.